Kyrkjebygg

Kyrkjebygg - omtale og vurdering

 Kviteseid kyrkje

Innvigd 18. juni 1916.
Kviteseid kyrkje vart teikna av arkitekt Børve i Porsgrunn og bygd i 1915. 
Biskop Bert Støylen sto for vigslinga, 18. juni 1916. Kyrkja er bygd av raud granitt som vart henta frå steinbrotet ved Sundet ved Kviteseidbrui og frakta med hest på isen inn til ”Hamaren” i sentrum.
I 1937-38 måla kunstmålaren Rolf Klemetsrud apsis med motiv frå Jesu død og oppstode. Kyrkja er fin og ligg vakkert til, og er kan hende den vakraste kyrkja i Vest-Telemark. Den 16. nov. 1997 vart det markert i gudstenesta at orgelet var utvida med 4 stemmer. Orgelet har no 17 stemmer. Same året vart det sett opp rekkverk ute ved hovudtrappa, og året etter fekk alle benkane i kyrkja puter. I 2000 vart gradrennene kring kyrkjetårnet skifta ut i samband med lekkasje. Felles nøkkelsystem vart montert i kyrkja. I 2001 vart ljoskastarane skifta ut med to nye. Mygg og teleslynge vart installert i 2003, og nye ljos vart monterte over altaret og korbogen. I 2003/2004 vart dåpssakristiet måla, elektriske omnar skifta ut og ny ljosekrone og lampettar monterte. Arbeidet med rullestolinngang vart sluttført i 2004, med stein frå same steinbrotet som då kyrkja vart bygd.  Vinteren 2004/05 vart kyrkja måla innvendig. Det som bør gjerast i næraste framtid, er reparasjon og forsterking av blyglasa. Elles er kyrkja godt vedlikehalden.

Bårehus med reidskapsrom og vassklosett vart bygd i 1968.  Bårerommet vart måla i nye fargar i 2001 og står no fram som eit varmare rom enn tidlegare, då alt var måla i kvitt.
I forlenging av bårehuset er det planlagt ein ny driftsbygning for den nye kyrkjegarden og opphalds- rom for kyrkjetenarane.  I same bygget er det lagt til rette for toalett for funksjonshemma.

Kviteseid gamle kyrkje

Innvigd ein gong på siste halvdelen av 1100-talet.
Kyrkja er ei av dei eldste kyrkjene i Telemark. Brosjyren
”Kviteseid gamle kyrkje” gjev ei kort innføring i særmerkte trekk og hendingar med kyrkja. Ho har om lag 150 sitjeplassar.
Kyrkja ligg nær Kviteseid bygdetun, og det er dei som har omvisnings-ansvaret om sommaren. I 1996 vart det montert brannslangeskåp ved kyrkja med 50 m slange.
I 2000 vart Riksantikvaren og Fylkesarkeologen i Telemark innkalla til synfaring.  Frå denne synfaring vart det utarbeidd ein tilstandsrapport. Denne rapporten fortel at det er store vedlikehaldsoppgåver.  Nokre av desse må gjerast omgåande, og resten skal det utarbeidast ein tidsplan for. Vindaugo på sørsida av skipet vart reparerte i 2002.
Store vedlikehaldsoppgåver står att, slik som kalking utvendig, reparasjon av råteskadar i  våpenhuset, utskifting av spontaket over apsis og utskifting av vindskeibord på taket. Lynvernanlegg manglar. Desse oppgåvene vil nok utgjere ein kostnad på fleire hundre tusen kroner.Eit pipeorgel som tidlegare stod i Flatdal kyrkje, er restaurert og sto klar sommaren 2009..

 Brunkeberg kyrkje

Innvigd 20. oktober 1790.
Kyrkja er ei tømra korskyrkje som utvendig er bordkledd. Mykje          
interessant historisk stoff er samla i eit jubileumsskrift frå 1990:  
”Brunkeberg kyrkje 200 år.”
I 1996/97 samla soknerådet inn midlar til bygging av eit nytt tilbygg til  kyrkja med prestesakristi og gang/wc til kyrkjesalen. Tilbygget vart innvigd 19. oktober 1997. Brannslangeskåp med 50 m slange kom på plass i 1997.  I 2000 vart det montert felles nøkkelsystem i kyrkja, og nytt kjøken vart sett inn i kyrkjesalen. I 2003 vart dei gamle ljoskastarane skifta ut med nye. Bygging av rullestolinngang vart utført i 2003. Året etter vart kyrkja måla. I kyrkjesalen vart ein del av golvet skifta ut p.g.a. soppangrep i 2004. Det er ikkje montera brannvarslings- eller lynvernanlegg i kyrkja. Kyrkja er ikkje isolera, men er elles godt vedlikehalden.
Bårehus med reidskapsrom og vassklosett vart bygd i 1982.  I 1999 vart bårerommet måla i nye fargar, og står no fram som eit varmare rom enn tidlegare, då alt var måla i kvitt.

Vrådal kyrkje

Innvigd  17. juni 1887
Kyrkja er ei langkyrkje i tre med 140 sitjeplassar i skipet og 30 på galleriet. Ho er tømra, men bordkledd både innvendig og utvendig.
I 1995/1996 vart kyrkjetårnet reparert og koparplater skifta ut. På same tid vart lynvernanlegg montert. I 1998 vart brannslangeskåp sett opp med 50 m brannslange og nytt høgtalaranlegg montera. Hovuddøra til kyrkja vart restaurert i 1999 i samband med planar om ny rullestolinngang – som stod ferdig i 2001. I 1999 vart òg den delen av bårehuset som inneheld reidskapsrom og toalett, bygd om etter dagens standard. Sjølve båreromet vart måla og golvet fekk fliser. I 2000 vart det montert felles nøkkel-system i kyrkja. I 2004 vart taket over den innvendige himlinga isolert med 20 cm Glava, og same året vart det kjøpt inn puter til benkane. Nytt teppe vart lagt i våpenhuset og i kyrkjeskipet i 2005. Kyrkja bør målast i næraste framtid, og nye innvendige vindusrammer/glasruter bør monterast og veggen må isolerast. Det er ikkje montera brannvarslings- eller lynvernanlegg i kyrkja. Elles er kyrkja godt vedlikehalden.

 Fjågesund kyrkje

Innvigd måndag 19.juni 1916, dagen etter Kviteseid kyrkje.
Kyrkja er teikna av arkitekt Børve, same arkitekt som Kviteseid kyrkje.
Ho var fyrst kapell i Kviteseid sokn, men vart frå 01.01.1997
soknekyrkje i Fjågesund og Kilen sokn.
Kyrkja vart beisa i 1993, og nytt sanitæranlegg stod ferdig året etter.
Ny orgelmotor vart sett inn i 1996.
Det er ikkje montera brannvarslings- eller lynvernanlegg i kyrkja.
Det er dårlege parkeringstilhøve. Dette bør ein finne ei løysing på.
Kyrkja er godt vedlikehalden.

 Kilen kapell

Innvigd 10. august 1958.
Kapellet er teikna av arkitekt Bjåen, Horten. Det låg tidlegare under Kviteseid sokn, men etter 01.01.1997 vart det kapell i Fjågesund og Kilen sokn.

Takrennene vart skifta ut i 1995. Kapellet vart måla utvendig i 1999-2000.
I år 2000 kom nye lampettar og lysekrone på plass. I 2005 vart så sjølve kyrkjeromet renovert og måla i meir samstemte fargar enn tidlegare, og nye gardiner kom opp.
Det bør byggjast eit nytt sanitærbygg, elles er kapellet godt vedlikehalde.

Sist oppdatert 16.12.2010