Byggjetiltak på eigedom som det er bygt på

Dersom du ønskjer å setje i gang eit mindre byggjetiltak på eigedommen din, må du søkje om løyve frå kommunen. Eit mindre byggjetiltak er

• oppføring av eitt enkelt tilbygg der korkje samla bruksareal (BRA) eller bygd areal (BYA) er over 50 m2. Tilbygget kan ha kjellar, men kan ikkje innehalde ei eiga bueining. Påbygg (ny etasje) eller underbygging (kjellar) av eksisterande byggjegrunn er ikkje omfatta 
• oppføring av éin enkelt frittliggjande bygning som du ikkje skal bu i. Samla bruksareal eller bygd areal kan ikkje vere over 70 m2. Bygningen kan ha inntil éin etasje og i tillegg ha kjellar 
• bruksendring frå tilleggsdel til hovuddel innanfor ei brukseining, til dømes å gjere om ei kjellarbu til kjellarstove
• oppsetting eller montering av skilt, reklameinnretningar o.l. inntil 6,5 m2 montert på vegg eller med høgd inntil 3,5 meter og breidd inntil 1,5 meter montert frittståande på terreng. Skiltet må ikkje utgjere fare for persontryggleiken. Det kan ikkje monterast fleire på same staden/fasaden 
• oppsetting av antennesystem med høgd inntil 5 meter. Antenna må ikkje utgjere fare for persontryggleiken. Det kan ikkje monterast fleire på same staden/fasaden

Det finst nokre søknadspliktige byggjetiltak du kan stå som ansvarleg for sjølv. Det vil seie at det ikkje er pålagt med ansvarlege føretak. Sjølv om det ikkje er nødvendig med ansvarlege føretak, gjeld dei tekniske krava fullt ut.

Kommunen kan òg unnta andre mindre tiltak frå kravet om ansvar dersom det etter ei vurdering ikkje er behov for å krevje at eit byggjetiltak gjennomførast av ansvarlege føretak.

Du betalar eit gebyr for saksbehandlinga.

 Gebyr for behandling av plan- og byggesaker og utsleppsløyve

• Nabovarsling må vere gjort
• Tiltaket må oppfylle alle krava til tiltaket i plan- og bygningslova, slik som avstand til nabo, visuell utforming og tekniske krav
• Tiltaket må ikkje vere i strid med arealdelen i kommuneplanen eller reguleringsplanen

Byggesak

Du sender ein skriftleg søknad til kommunen. Det må gå fram om du søkjer om dispensasjon frå nokre av vilkåra (sjå over).

• Situasjonskart
• Fagmessig utførte plan-, snitt- og fasadeteikningar
• Utgreiing/kvittering for nabovarsling og eventuelle nabomerknader

Kommunen kan krevje meir dokumentasjon dersom det er nødvendig.

Ein fullstendig søknad om løyve som ikkje medfører dispensasjon frå vilkåra, skal avgjerast av kommunen innan tolv veker. Byggjesaksgebyret skal reduserast med 25 % for kvar påbegynte veke tidsfristen overskridast.

Dersom det i tillegg ikkje har kome merknader frå naboar/gjenbuarar og det ikkje er nødvendig med fråsegner frå annan myndigheit, skal kommunen avgjere saka innan tre veker. Dersom kommunen ikkje har avgjort søknaden innan fristen har gått ut, reknast løyve for gjeve, forutsett at det du søkjer om, ikkje er i strid med gjeldande reglar og planar. Har det derimot kome protestar frå naboar/gjenbuarar, og kommunen ikkje har gjort vedtak innan trevekersfristen, kan du ikkje rekne løyve for gjeve.

Dersom du er misnøgd med vedtaket, kan du klage til kommunen innan ein frist på tre veker frå du mottok det. Forklar kva du er misnøgd med og kvifor du meiner at vedtaket bør endrast. Treng du rettleiing, kan du vende deg til kommunen. Dersom kommunen lar vedtaket stå, blir saka sendt vidare til Fylkesmannen, som avgjer om klagen skal takast til følgje.

Sist oppdatert:  27.12.2012